अमेरिका र क्रोएसिया पठाउने भन्दै ४० लाख ५० हजार ठगी गर्ने दुई जनालाई काठमाडौँ उपत्यका अनुसन्धान कार्यालयले पक्राउ गरेको छ। प्रहरीले बिहीबार उनीहरूलाई सार्वजनिक गरेको हो।
पक्राउ पर्नेमा दोलखा शैलुङ गाउँपालिका–२ की ४५ वर्षीया रुकुकुमारी श्रेष्ठ र मोरङ उर्लाबारी नगरपालिका–६ का ३५ वर्षीय शैलेन्द्र शाक्य छन्। प्रहरी उपरीक्षक शरतकुमार थापा क्षेत्रीका अनुसार श्रेष्ठले अमेरिका पठाउने भन्दै ३५ लाख रुपैयाँ लिएकी थिइन्।
शाक्यले क्रोएसिया पठाउने प्रलोभनमा पारी तीन लाख ५० हजार रुपैयाँ ठगी गरेको उजुरी परेको थियो। उनीहरूले विदेश पठाइदिने भन्दै रकम लिएर सम्पर्कविहीन भएको भन्दै पीडितहरूले प्रहरीमा उजुरी दिएका थिए।
थापा क्षेत्रीले पीडितहरूको उजुरीका आधारमा उनीहरूलाई काठमाडौँ उपत्यकाका विभिन्न स्थानबाट पक्राउ गरिएको जानकारी दिए। पक्राउ परेका दुवै जनालाई थप अनुसन्धान र कारबाहीका लागि वैदेशिक रोजगार विभाग, ताहाचल पठाइएको छ।
