चीनको औपचारिक भ्रमणमा रहेका परराष्ट्रमन्त्री शिशिर खनालले २०६३ सालपछिका ठूला भ्रष्टाचार तथा सम्पत्ति शुद्धीकरणका घटनाहरूको छानबिन प्रक्रिया अघि बढेको दाबी गरेका छन्। उनले सरकारले भ्रष्टाचार नियन्त्रण र सुशासनलाई उच्च प्राथमिकतामा राखेको बताए।
नेपाली दूतावासले बेइजिङमा आयोजना गरेको डायस्पोरा अन्तर्क्रिया कार्यक्रममा मन्त्री खनालले राष्ट्रिय स्वतन्त्र पार्टी (रास्वपा) सरकारमा सहभागी भएपछि चुनावताका गरेको सुशासनको प्रतिबद्धता कार्यान्वयनमा जोड दिएको बताए।
उनले लामो समयदेखि राज्य सञ्चालन गर्ने शक्तिहरूले प्रभावकारी शासन दिन नसकेको निष्कर्षका आधारमा सरकारमा सहभागी भएको उल्लेख गरे। सेवा प्रवाहलाई सरल, छिटो र झन्झटरहित बनाउन प्रविधिमैत्री शासन प्रणालीमा जोड दिइएको छ।
विदेशमा रहेका नेपाली नागरिकको समस्या समाधान सहज बनाउन परराष्ट्र मन्त्रालयले ‘मोफा मित्र’ एप सञ्चालनमा ल्याएको छ। विदेशमा समस्या परेमा उक्त एपमार्फत गुनासो दर्ता गर्न सकिनेछ।
एपमार्फत प्राप्त गुनासोमा सम्बन्धित नेपाली दूतावाससँग तत्काल समन्वय गरी समाधान प्रक्रिया सुरु गरिने मन्त्री खनालले स्पष्ट पारे। सरकारले परिणाममुखी ढंगले काम गरिरहेको दाबी गर्दै निकट भविष्यमा नागरिकले प्रत्यक्ष परिवर्तन अनुभूति गर्ने अपेक्षा उनले व्यक्त गरे।
