सर्लाही । कविलासी नगरपालिका ८ अगर्वामा सोमबार राति पार्किङ गरिएको ट्रकमा पूर्व प्रदेशसभा सदस्य अशोक यादवको ट्याक्टर ठोक्कियो । दुर्घटनापछि यादवसहित २०-२५ जनाको समूहले प्रहरीमाथि हातपात गरी ट्याक्टर लिएर फरार भएको आरोप छ । प्रहरीले यादवका भतिजा १९ वर्षीय बिक्रमकुमार यादव र भान्जा २१ वर्षीय प्रियांशु यादवलाई पक्राउ गरेको छ ।
उनीहरूविरुद्ध अभद्र व्यवहार मुद्दामा सर्लाही जिल्ला अदालतबाट आठ दिनको म्याद थप भएको छ । जिल्ला प्रहरी कार्यालय सर्लाहीका प्रवक्ता डीएसपी वेदप्रसाद गौतमले यादवको खोजी जारी रहेको बताए । मंगलबार दिउँसो प्रहरी टोली यादवको घर पुगे पनि उनी फेला परेनन् ।
प्रहरी कारबाहीमा अवरोध र हातपातको आरोपमा यादवको खोजी तीव्र पारिएको छ । यादवले मंगलबार फेसबुकमार्फत भिडियो सन्देश जारी गर्दै आफूमाथि अन्याय, अत्याचार र भ्रष्टाचारविरुद्ध आवाज उठाउँदै आएकाले फसाउन खोजिएको दाबी गरे ।
गत वर्ष पूर्वाधार विकास कार्यालय मलंगवामा कर्मचारीमाथि हातपात र तत्कालीन एसपी योगेन्द्रकुमार खड्कासँग गालीगलौज गरेको आरोपमा यादव एक महिना हिरासत बसेका थिए । धरौटीमा रिहा भएका उनीविरुद्ध प्रहरीले थप अनुसन्धान गरिरहेको छ ।
