सरकारी कर्मचारीको वैदेशिक भ्रमणका लागि अब प्रधानमन्त्री तथा मन्त्रिपरिषद्को कार्यालयको पूर्वस्वीकृति अनिवार्य भएको छ। प्रधानमन्त्री कार्यालयले सबै मन्त्रालय र सरकारी निकायहरूमा परिपत्र जारी गर्दै यो निर्देशन दिएको हो।
कार्यालयका प्रवक्ता हेमराज अर्यालले आज आयोजित पत्रकार सम्मेलनमा यो जानकारी दिए। यस व्यवस्थाले वैदेशिक भ्रमणलाई व्यवस्थित, पारदर्शी र मितव्ययी बनाउने लक्ष्य राखिएको छ।
नयाँ व्यवस्थाअनुसार, वैदेशिक भ्रमणबाट प्राप्त ज्ञान, सीप र अनुभवलाई संस्थागत रूपमा उपयोग गरिनेछ। भ्रमणबाट फर्केको पाँच दिनभित्र सम्बन्धित कर्मचारीले हासिल गरेको ज्ञान आफ्नै कार्यालयका अन्य कर्मचारीहरूसँग बाँड्नुपर्नेछ।
