कृषि, वन तथा वातावरणमन्त्री गीता चौधरीले चालु आर्थिक वर्षको अन्त्यसम्ममा कूल ६ लाख मेट्रिक टन रासायनिक मल कृषकलाई अनुदानमा उपलब्ध गराइने बताएकी छन् ।
राष्ट्रियसभाको बैठकमा सांसदहरुले सोधेको प्रश्नको जवाफ दिँदै मन्त्री चौधरीले हालसम्म ५ लाख ५८ हजार ५२२ मेट्रिक टन मल आपूर्ति भइसकेको र ४ लाख ६८ हजार १६ मेट्रिक टन वितरण गरिसकिएको जानकारी दिइन् । हाल १ लाख ६८ हजार ८०२ मेट्रिक टन मौज्दात छ ।
उनले धान रोपाइँको याममा मल अभाव हुन नदिन आपूर्तिकर्तालाई समयमा मल पठाउन ताकेता गरिएको बताइन् ।
असार अन्तिम सातादेखि साउन महिनासम्ममा ९० हजार मेट्रिक टन मल नेपाल भित्रिने अपेक्षा गरिएको छ । भारतसँग जिटुजी खरिद माध्यमबाट ८० हजार मेट्रिक टन मल खरिद गर्न मन्त्रिपरिषद्बाट सैद्धान्तिक स्वीकृति प्राप्त भएसँगै पहिलो चरणमा ३० हजार टन युरिया र २० हजार टन डिएपी खरिद प्रक्रिया सुरु गरिएको छ । उक्त परिमाणको मल साउन महिनादेखि नेपाल भित्रिनेछ ।
मन्त्री चौधरीले मलको सन्तुलित प्रयोग र प्राङ्गारिक तथा जैविक मलको प्रयोगलाई जोड दिन सूचना प्रवाह गरिएको बताइन् ।
अनुदानको मल वितरणलाई व्यवस्थित, पारदर्शी र सहज बनाउन ‘अनुदानको मल वितरण कार्य व्यवस्थापन निर्देशिका २०८२’ को प्रभावकारी कार्यान्वयनका लागि प्रदेश, स्थानीय तह र जिल्ला प्रशासन कार्यालयलाई परिपत्र गरिएको छ ।
