चेक अनादर मुद्दामा अदालतबाट दुई वर्ष कैद सजाय तोकिएपछि फरार रहेका ग्रेटर नेपाल अभियानका अध्यक्ष फडिन्द्र नेपाललाई प्रहरीले पक्राउ गरेको छ।
उपत्यका अपराध अनुसन्धान कार्यालयका एसएसपी सन्तोष खड्काका अनुसार सङ्खुवासभाका स्थायी घर भई हाल भक्तपुरको ठिमी बस्दै आएका ६७ वर्षीय नेपाललाई बुढानीलकण्ठ नगरपालिका–१० बाट पक्राउ गरिएको हो।
उनीमाथि चेक अनादर मुद्दामा बिगोबापत दुई वर्ष कैद सजाय तोकिएको थियो। पक्राउ परेका नेपाललाई आवश्यक कानुनी प्रक्रिया तथा सजाय कार्यान्वयनका लागि सम्बन्धित निकायमा बुझाउने प्रक्रिया अघि बढाइएको प्रहरीले जनाएको छ।
विज्ञापन
नेपाल त्रिभुवन विश्वविद्यालयका पूर्वप्राध्यापक समेत हुन्। राष्ट्रिय स्वतन्त्र नागरिक समाजका अध्यक्ष समेत रहेका नेपालविरुद्ध युवराज खत्रीले ऋण तिर्न दिएको चेक नसाटिएपछि जाहेरी दिएका थिए।
