रसुवाको हाकु–२१६ सुरुङमा उद्धारका लागि आफूलाई हेलिकप्टरमा जान आग्रह गरिए पनि फोटो खिचाउन मात्र घटनास्थल पुग्नुको अर्थ नभएको राप्रपा संसदीय दलका नेता ज्ञानेन्द्र शाहीले बताएका छन्। गृहमन्त्रीले शाहीलाई हेलिकप्टर चढेर काठमाडौंबाट रसुवा जान आग्रह गरेका थिए।
शाहीले आफू सुरुङ उद्धारको विज्ञ नभएको भन्दै दक्ष प्राविधिक र विशेष उद्धार टोली पठाउन आग्रह गरे। उनले सुरुङभित्र गएर उद्धार गर्ने प्राविधिक क्षमता र विशेषज्ञता आफूसँग नभएको स्पष्ट पारे। शाहीले आफ्नो सट्टामा सुरुङको प्राविधिक अनुगमन तथा उद्धार गर्न सक्ने अनुभवी विज्ञ र विशेष उद्धार टोली तत्काल पठाउनुपर्ने बताए।
‘अहिले हामीलाई फोटो खिचाउने मान्छे होइन, नागरिकको जीवन बचाउन सक्ने विज्ञ र उद्धारकर्ता चाहिएको छ,’ शाहीले भने। उनले प्रचारका लागि हेलिकप्टर चढेर जान नचाहेको बताए। ज्ञान, प्रविधि, अनुभव र जोखिम व्यवस्थापनको क्षमता भएका दक्ष टोलीलाई तत्काल सुरुङभित्र पठाउनुपर्नेमा उनले जोड दिए।
शाहीले हाकु–२१६ सुरुङभित्र अझै जमेको हिलो नहटाइएको भन्दै उद्धारका लागि आवश्यक हिलो हटाउने मेसिन तथा अन्य उपकरण तत्काल उपलब्ध गराउन गृहमन्त्रीसँग आग्रह गरे। ‘कृपया मलाई बोलाउनु वा उडाउनुभन्दा त्यहाँ जमेको हिलो हटाउन आवश्यक हिलो फाल्ने मेसिन र उपकरण तत्काल उपलब्ध गराइदिनुहोस्,’ शाहीले भने।
यसैबीच, लाङटाङ जलविद्युत् परियोजनाको सुरुङमा फसेका श्रमिकको उद्धार गर्न नेपाली सेनासहितको प्राविधिक टोली बिहीबार भित्र छिर्ने भएको छ। परियोजनाका ४१ जना सम्पर्कविहीन भएकामा सोमबार एउटा शव भेटिएको थियो।
