पृथ्वी राजमार्गको धादिङ खण्ड कृष्णभिरमा पहिरो खस्दा शनिबार बिहानैदेखि यातायात ठप्प छ। प्रहरीका अनुसार सोही राजमार्गको बेनीघाट रोराङ-१० जवाङखोला र शितलबजार क्षेत्रमा पहिरो पन्छाएर एकतर्फी यातायात सञ्चालन गरिएको छ।
सिन्धुपाल्चोकको भोटेकोशी गाउँपालिका-२ घट्टेखोलामा पहिरो खस्दा अरनिको राजमार्ग पूर्ण रूपमा ठप्प छ। रसुवाको उत्तरगया गाउँपालिका-५ खाल्टेमा बाढीले त्रिशुली-मैलुङ-स्याफ्रुबेशी सडक खण्ड बन्द गराएको छ। नुवाकोटको बेत्रावती-१० सिमटारमा बाढीले पासाङ ल्हामु सडक खण्ड ठप्प पारेको छ।
टोखा-छहरे सडक खण्डको शिवपुरी गाउँपालिका-८ घट्टेखोलामा सम्भावित जोखिमले राति १० देखि बिहान ५ बजेसम्म सवारी रोकेको छ। बीपी राजमार्गको काभ्रे खण्डमा भने बिहान ४ देखि साँझ ६ बजेसम्म सवारी चल्न दिइएको छ।
कर्णाली प्रदेशको कालिकोटको शुभकालिका गाउँपालिका-१ गगने खोलामा पहिरोले कर्णाली राजमार्ग अवरुद्ध छ। Nmkhabarलाई स्रोतले पुष्टि गर्यो।
