कोशी, बागमती र गण्डकी प्रदेशका हिमाली तथा पहाडी भू-भागमा आज भारी वर्षाको सम्भावना छ। मौसम पूर्वानुमान महाशाखाले मनसुनी वायुको प्रभावले यस्तो अवस्था आउने जनाएको छ। पश्चिमी वायुको आंशिक प्रभावले पनि मौसम बदली गराएको छ।
महाशाखाका अनुसार कोशी, बागमती र गण्डकी प्रदेशका हिमाली भू-भागका एक-दुई स्थानमा भारी वर्षा हुनेछ। लुम्बिनी, कर्णाली र सुदूरपश्चिम प्रदेशका हिमाली भू-भागका थोरै स्थानमा मेघगर्जन र चट्याङसहित मध्यम वर्षा र हिमपातको सम्भावना छ। देशका पहाडी भू-भागका केही स्थानमा मध्यम वर्षा र हिमपातको सम्भावना छ। तराईका भू-भागका थोरै स्थानमा मध्यम वर्षा हुनेछ।
रातिको समयमा पनि कोशी, बागमती, गण्डकी र कर्णाली प्रदेशका हिमाली तथा पहाडी भू-भागका थोरै स्थानमा वर्षा हुनेछ। लुम्बिनी र सुदूरपश्चिम प्रदेशका हिमाली भू-भागका एक-दुई स्थानमा मेघगर्जन, चट्याङसहित मध्यम वर्षा र हिमपातको सम्भावना छ। तराईका भू-भागका एक-दुई स्थानमा मध्यम वर्षा हुनेछ।
वर्षापछि ती क्षेत्रमा गेग्रान बहाव, बाढी, पहिरो र भू-क्षय जस्ता प्रकोपको जोखिम बढ्नेछ। यसले दैनिक जनजीवन, कृषि, स्वास्थ्य, पर्यटन, पर्वतारोहण, सडक तथा हवाई यातायातमा असर पार्ने सम्भावना छ। मौसम पूर्वानुमान महाशाखाले सतर्क रहन अनुरोध गरेको छ।
