धादिङको कृष्णभिरसहित सात ठाउँमा पहिरो खसेपछि पृथ्वी राजमार्ग अवरुद्ध भएको छ। भदौ १४ गते त्रिशूली नदीको कटानले भासिएको सोही डाइभर्सन क्षेत्रमा पुनः पहिरो झरेको हो। कान्तिलोकपथ र बीपी राजमार्गमा पनि पहिरोले आवागमन रोकिएको छ।
बीपी राजमार्गअन्तर्गत रोशी गाउँपालिका-७ चारसयबेँसी र रोशी-८ गिम्दीमा पहिरो खस्दा सडक अवरुद्ध भएको छ। जिल्ला प्रशासन कार्यालयले बाढीपहिरोको अवस्था हेरी रातिको समयमा सवारी आवागमनमा रोक लगाएको छ। सम्भावित जोखिमबारे नागरिकलाई सचेत गराइएको छ।
सङ्खुवासभाको खाँदबारी-किमाथाङ्का सडकखण्डको भोटखोला गाउँपालिका-३ हुङहुङमा पहिरो खसेपछि उत्तर-दक्षिण कोशी राजमार्ग अवरुद्ध भएको छ। लगातारको वर्षाले पहिरो पन्छाउन कठिनाई भइरहेको सडक आयोजना कार्यालयले जनाएको छ।
सडक इन्जिनियर रामबहादुर गुरुङका अनुसार अहिले सवारीसाधन सञ्चालन गर्न सक्ने अवस्था छैन। वर्षा नरोकिएकाले सडक खुलाउने प्रयासमा चुनौती थपिएको छ।
