हुम्लाको सिमकोट-हिल्सा नाका प्रयोग गरी यस वर्ष तीन हजार ७८० भारतीय तीर्थयात्रीले कैलाश मानसरोवरको दर्शन गरेका छन्। वैशाख ३० गतेदेखि सुरु भएको यो यात्राले यस क्षेत्रको पर्यटन गतिविधि तीव्र बनाएको छ।
आगन्तुकमध्ये एक हजार ८९२ महिला र एक हजार ८८८ पुरुष छन्। दैनिक ८० देखि २०० भारतीय पर्यटक हवाई मार्गबाट हुम्ला पुगिरहेका छन्।
पर्यटकको बढ्दो चहलपहलले स्थानीय अर्थतन्त्रमा सकारात्मक प्रभाव पारेको छ। सिमकोट र हिल्सा आसपासका होटल, रिसोर्ट भरिभराउ भएका छन्। होटल व्यवसायीको आम्दानी बढेको छ। विमानस्थलदेखि होटलसम्म सामान ओसार्ने ३० भन्दा बढी भरियाले रोजगारी पाएका छन्। स्थानीय कृषिउपजले पनि राम्रो बजार पाएको छ।
यात्रु चाप बढेसँगै हवाई सेवा विस्तार गरिएको छ। निजी वायुसेवा कम्पनीले दैनिक छ उडानमार्फत नेपालगञ्ज–सिमकोट सेवा सञ्चालन गरिरहेका छन्। छ वटा हेलिकप्टरले सिमकोटबाट हिल्सासम्म नियमित उडान गर्छन्। हेलिकप्टर सेवा बिहान ६:३० देखि बेलुका ७ बजेसम्म चल्छ।
पर्यटकको गतिविधि सिमकोटमा मात्र सीमित छैन। नेपाल–चीन सीमा क्षेत्र हिल्सामा व्यापारिक तथा आवासीय गतिविधि बढेको छ। स्थानीय होटल व्यवसायी, यातायात र श्रमिक क्षेत्रले यसको लाभ लिइरहेका छन्।
सिमकोट विमानस्थलमा बिहानदेखि बेलुकासम्म यात्रुको चहलपहल रहन्छ। यात्रु र उडानको चापले विमानस्थल क्षेत्रमा ट्राफिक व्यवस्थापन चुनौतीपूर्ण बनेको छ।
