धरान उपमहानगर ५ खैरेनीबाट १ अर्ब ३ करोड ८४ लाख ७५ हजार ८४५ रुपैयाँ बराबरको हुण्डी कारोबारमा संलग्न आरोपमा ज्योति शाही पक्राउ परेका छन्। केन्द्रीय अनुसन्धान ब्युरो (सीआईबी), कोशी प्रदेश प्रहरी र जिल्ला प्रहरी सुनसरीको टोलीले बिहीबार अपराह्न शाहीलाई पक्राउ गरेको हो।
शाहीमाथि विदेशमा आर्जन गरेको रकम अनौपचारिक माध्यमबाट नेपाल भित्र्याई कनेक्ट आईपीएस लगायतका विद्युतीय माध्यम प्रयोग गरी कारोबार गरेको आरोप छ। प्रहरीले बरामद गरेको रकम र शाहीसँगको बयानका आधारमा थप अनुसन्धान गरिरहेको छ। यस्ता अनौपचारिक माध्यमबाट हुने कारोबारले मुलुकको वित्तीय प्रणालीमा चुनौती थप्नुका साथै राजस्व संकलनमा समेत असर पार्ने गरेको छ।
