अवैध हुण्डीमार्फत एक अर्ब तीन करोडभन्दा बढीको कारोबार गरेको आरोपमा प्रहरीले सुनसरीकी ज्योति शाहीलाई पक्राउ गरेको छ। केन्द्रीय अनुसन्धान ब्युरो (सीआईबी) ले बिहीबार धरानबाट शाहीलाई नियन्त्रणमा लिएको हो।
सीआईबी प्रवक्ता अनुपमशमशेर जबराका अनुसार, विदेशमा आर्जन गरेको रकम अनौपचारिक माध्यमबाट नेपाल भित्र्याई विभिन्न व्यक्तिका बैंक खातामार्फत कारोबार गरेको सूचनाका आधारमा शाहीलाई पक्राउ गरिएको हो।
शाहीले विदेशबाट प्राप्त रकमलाई स–साना भागमा विभाजन गरी कनेक्ट आईपीएसलगायत विद्युतीय माध्यमबाट असम्बन्धित व्यक्तिका खातामा पठाउने गरेको खुलेको छ। यसरी नै उनले हुण्डी कारोबार सञ्चालन गरेको पाइएको छ।
शाहीले ‘शाही मनि ट्रान्सफर’ नामक फर्ममार्फत कृषि विकास बैंक, सेन्चुरी कमर्सियल बैंक, ग्लोबल आइएमई बैंकसहित ५२ वटा बैंक तथा वित्तीय संस्थामा उक्त रकमको कारोबार गरेको पाइएको छ।
हुण्डी कसुरमा अनुसन्धानका लागि जिल्ला अदालत सुनसरीबाट पक्राउ अनुमति लिई शाहीलाई धरानको खैरेनीबाट पक्राउ गरिएको प्रहरीले जनाएको छ। शाहीमाथि थप अनुसन्धान भइरहेको छ।
