काठमाडौं विमानस्थलबाट ४२,४०० कतारी रियाल र ७,५०० अमेरिकी डलरसहित दुई जना पक्राउ परेका छन्।
अन्तर्राष्ट्रिय प्रस्थानतर्फको ह्यान्ड ब्यागेज चेकिङ क्षेत्रमा खटिएको प्रहरी टोलीले सुनसरीका ४० वर्षीय बेचन मिया र ५१ वर्षीय चिनियाँ नागरिक ‘YO YOULONG’लाई नियन्त्रणमा लियो। उनीहरूले मुद्राको वैधानिक स्रोत खुलाएनन्। झोलामा लुकाई विदेश लैजान लाग्दा सुरक्षाकर्मीले फेला पारेको विमानस्थल सुरक्षा कार्यालयले जनायो।
कतार एयरको उडानमार्फत काठमाडौंबाट कतार जान लागेका मियाको हाते झोलामा शंकास्पद वस्तु देखिएको थियो। खानतलासी गर्दा ४२ हजार ४ सय कतारी रियाल बरामद भयो।
सोही दिन चाइना ईष्टर्नको उडानद्वारा चीनतर्फ प्रस्थान गर्न लागेका ‘YO YOULONG’को साथबाट ७ हजार ५ सय अमेरिकी डलर बरामद भयो। उनले पनि विदेशी मुद्रा लैजानुपर्ने कारण र स्रोतको आधिकारिक प्रमाण पेस गर्न सकेनन्।
बरामद विदेशी मुद्रासहित दुवैलाई कानुनी कारबाहीका लागि राजस्व अनुसन्धान विभागमा बुझाउने तयारी छ।
