इरानको दक्षिण–पूर्वी सिस्तान–बलुचिस्तान प्रान्तमा बिहीबार सैनिक कर्मचारी सवार मिनीबस र प्रहरी गस्ती टोलीमाथि सशस्त्र आक्रमण हुँदा दुई जनाको मृत्यु भएको छ।
आक्रमणमा तीन जना घाइते भएका छन्। इरानी समाचार संस्था इर्नाका अनुसार मकरान तटमा तैनाथ एक सैनिक विभागका कर्मचारीहरू सवार मिनीबसलाई बिहीबार बिहान सशस्त्र समूहले आक्रमण गरेको हो।
उक्त आक्रमणमा एक जनाको मृत्यु भएको छ भने तीन जना घाइते भएका छन्। मृतक व्यक्ति सेनाका कर्मचारी भए वा नभएकोबारे इर्नाले स्पष्ट पारेको छैन।
बिहीबार नै सोही प्रान्तमा प्रहरी गस्ती टोलीमाथि पनि सशस्त्र आक्रमण भएको छ। प्रान्तीय प्रहरीले इर्नामार्फत जारी गरेको वक्तव्यमा कारबाहीमा खटिएको प्रहरी गस्ती टोली ‘सशस्त्र गैरकानुनी व्यक्तिहरू’को आक्रमणमा परेको उल्लेख गरिएको छ।
प्रहरीका अनुसार यस आक्रमणमा एक प्रहरी अधिकृतको मृत्यु भएको छ। केही आक्रमणकारी घाइते भएर फरार भएको प्रहरीले जनाएको छ।
सिस्तान–बलुचिस्तान प्रान्त पाकिस्तान र अफगानिस्तानसँग सीमा जोडिएको छ। यो इरानका सबैभन्दा गरिब प्रान्तमध्ये एक हो जहाँ जातीय बलुच समुदायको बाहुल्यता छ।
आक्रमणकारीहरूको पहिचान र उनीहरू कुन समूहका हुन् भन्नेबारे थप विवरण आउन बाँकी छ। घाइते आक्रमणकारीहरूको अवस्था पनि अस्पष्ट छ।
