सर्लाहीको भूमिगत जलस्रोत तथा सिँचाइ विकास डिभिजन कार्यालयका प्रमुख अनुपमा ढकाल र मेकानिकल अधिकृत तुलाकान्त चौधरीविरुद्ध अख्तियार दुरुपयोग अनुसन्धान आयोगले ७ लाख ५० हजार घुस लिएको आरोपमा विशेष अदालत काठमाडौंमा मुद्दा दायर गरेको छ। उनीहरूले बोरिङ र मोटर जडान कार्य सम्पन्न गराएबापत उक्त रकम घुस लिएको अभियोग छ।
अख्तियारले दुवै जनालाई बिगो सात लाख ५० हजार कायम गरी भ्रष्टाचार निवारण ऐन, २०५९ बमोजिम कैद र जरिवानाको मागदाबी गरेको छ। आयोगका प्रवक्ता सुरेश न्यौपानेले घुस लिएको पुष्टि भएपछि विशेष अदालतमा आरोपपत्र दर्ता गरिएको बताए।
