जनकपुर प्रादेशिक अस्पतालमा कार्यरत चिकित्सक सरोज साहमाथि हातपात तथा कुटपिटमा संलग्न भएको आरोपमा दुई जना पक्राउ परेका छन्। धनुषा प्रहरीले औरही गाउँपालिका–२ का २० वर्षीय विजय मुखिया र जनकपुर उपमहानगरपालिका–८ की २६ वर्षीया सुधिरा मुखिया बिनलाई नियन्त्रणमा लिएको हो।
पक्राउ परेका दुवै जनामाथि थप अनुसन्धानका लागि धनुषा जिल्ला अदालतबाट तीन दिनको म्याद लिइएको छ। प्रहरी प्रवक्ता एवं डिएसपी ओमप्रकाश खनालका अनुसार आरोपितहरू स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ को दफा ३ (ग) बमोजिमको कसुरमा अनुसन्धानमा छन्।
गत बिहीबार अस्पतालको बर्थिङ सेन्टरमा शल्यक्रियामा लापरबाही भएको भन्दै एक महिलाका आफन्तले ड्युटीमा रहेका चिकित्सक साहलाई कुटपिट गरेका थिए। घटनापछि चिकित्सकहरू आन्दोलित भई आरोपितमाथि कारबाहीको माग गरेका थिए। अस्पतालमा यस्ता घटना बारम्बार हुने गरेको बताइएको छ।
