पूर्वमन्त्री जनार्दन शर्माले मुलुकका उपलब्धिहरू संघीयता, लोकतन्त्र र गणतन्त्रसमेत गम्भीर प्रश्नको घेरामा परेको दाबी गरेका छन्। शनिबार अग्रगामी मोर्चाको अवधारणापत्र सार्वजनिक गर्दै उनले राजनीतिक नेतृत्वले विगतका कमजोरीको निर्मम आत्मसमीक्षा नगरेसम्म मुलुकले सही दिशा लिन नसक्ने बताए।
राजनीतिमा सुधारको मोर्चा
राजनीतिमा सुधार र शुद्धीकरण गर्ने उद्देश्यका साथ मोर्चा गठन गरिएको हो। शर्माले ‘जनयुद्ध, जनआन्दोलन, संसदीय संघर्षका साथै मधेश, थारुवान र जनजाति आन्दोलनका अनुभवहरूलाई एकीकृत गर्दै अग्रगामी मोर्चा बनाइएको हो,’ भने। उत्पीडित वर्ग, जाति, क्षेत्र र समुदायका मुद्दा सम्बोधन गर्न साझा राजनीतिक अभियान आवश्यक भइसकेको छ।
परराष्ट्र नीति र राष्ट्रिय हित
परराष्ट्र नीतिका सम्बन्धमा नेपालको सार्वभौमसत्ता र राष्ट्रिय हितलाई केन्द्रमा राखिने अवधारणापत्रमा उल्लेख छ। छिमेकी मुलुकहरूसँग समानता र पारस्परिक सम्मानका आधारमा मात्रै सम्बन्ध विस्तार गरिनेछ।
सुकुम्वासी समस्या समाधानको खाका
सुकुम्वासी तथा अव्यवस्थित बसोबासको समस्या समाधानका लागि वैज्ञानिक र मानवीय दृष्टिकोण अपनाइने शर्माको भनाइ छ। वास्तविक सुकुमवासी र भू-माफियाको सूक्ष्म पहिचान गर्न संघ, प्रदेश र स्थानीय तहको संयुक्त संयन्त्र बनाउने योजना मोर्चाले अघि सारेको छ।
