झापामा ६ जनाको ज्यान गइसकेको छ। यो जापानी इन्सेफ्लाइटिस (जेई) संक्रमणबाट देशैभर २६ जनाको मृत्यु भएको तथ्यांकको सबैभन्दा ठूलो हिस्सा हो। स्वास्थ्य सेवा विभागको प्रतिवेदनले १६ जिल्लामा यो रोगले २६ को ज्यान लिएको देखाएको छ।
सुनसरी, सप्तरी, पर्सा, कैलाली र अर्घाखाँचीमा दुई–दुई जनाको मृत्यु भयो। मोरङ, इलाम, रौतहट, धनुषा, काभ्रे, दाङ, तनहुँ, नवलपरासी (पश्चिम), कञ्चनपुर र रोल्पामा एक–एक जनाले ज्यान गुमाए। पछिल्लो समय रोल्पा र तनहुँमा एक–एक जना संक्रमितको मृत्यु पुष्टि भएको छ।
मृत्यु हुनेमा १२ पुरुष र १४ महिला छन्। ७७ प्रतिशत मृतक ५० वर्षभन्दा माथिका छन्। सबैभन्दा चिन्ताजनक के छ भने, ज्यान गुमाएका १०० प्रतिशत बिरामीले खोप नलगाएको पाइएको छ। यस रोगको केस फ्याटालिटी रेट २१ प्रतिशत छ।
हालसम्म ७ प्रदेशका ३६ जिल्लाका ८४ पालिकामा १२१ जनामा जेई संक्रमण पुष्टि भएको छ। ५६ जना बिरामी उपचाररत छन्। पूर्वी नेपालबाट सुरु भएको यो संक्रमण तराईका जिल्लामा बढी देखिएको छ।
धान खेत र सुँगुर फार्म नजिक बसोबास गर्ने, खोप नलगाएका नागरिक यस रोगको उच्च जोखिममा छन्।
