झापामा जापानिज इन्सेफ्लाइटिस (जेई) संक्रमणबाट सात जनाको मृत्यु भएपछि पाँच लाख ७० हजार नागरिकलाई खोप दिइने भएको छ। स्वास्थ्य कार्यालय झापाले असोज ५ देखि १५ गतेसम्म ३० वर्षमाथिका नागरिकलाई लक्षित गरी यो अभियान सञ्चालन गर्दैछ।
कार्यालय प्रमुख बृजकुमार दासका अनुसार अभियानका लागि आवश्यक खोप जिल्लामा आइसकेको छ। स्थानीय तहसँगको समन्वय र स्वास्थ्यकर्मीको अभिमुखीकरण पूरा भएको छ।
जेई संक्रमण र मृत्युदर बढेपछि उच्च सतर्कता अपनाइएको छ। लक्षित समूहका कोही पनि नागरिक खोपबाट नछुटून् भन्ने उद्देश्यले तयारी गरिएको दासले बताए।
जिल्लाका १३१ वडामा ९०० खोप केन्द्र स्थापना गरिनेछन्। अभियानमा करिब ५०० स्वास्थ्यकर्मी, ६११ महिला स्वास्थ्य स्वयंसेविका र तीन हजारभन्दा बढी स्वयंसेवक परिचालन हुनेछन्।
झापामा हालसम्म १३ जनामा जेई संक्रमण पुष्टि भएको छ। संक्रमितमध्ये ५० वर्षमाथिका छ जना र आठ वर्षीय एक बालक छन्। मृत्यु भएका कसैले पनि जेईविरुद्धको खोप नलगाएको पाइएको छ।
प्रमुख दासले खोप पूर्ण सुरक्षित रहेको र सामान्य असर देखिए पनि गम्भीर समस्या नहुने बताए। गर्भवती तथा तत्काल खोप लगाउन नमिल्नेबाहेक सबैलाई खोप लगाउन उनले आग्रह गरे।
