झापाको बाह्रदशीमा जङ्गली च्याउ खाँदा तेजबहादुर खवासको परिवारका ११ सदस्य बिरामी परेका छन्, जसमा आठ बालबालिका छन्।
बुट्टाबारीका तेजबहादुर खवासको परिवारले आज बिहानको खानामा जङ्गली च्याउ सेवन गरेपछि उनीहरूमा स्वास्थ्य समस्या देखिएको हो।
जिल्ला प्रहरी कार्यालयका सूचना अधिकारी खगेन्द्रबहादुर खड्काले बिरामीको विवरण दिए। ५० वर्षीया कमलामाया खवास, ३१ वर्षीय डिल्ली खवास, २० वर्षीया अनिता खवाससहित आठ बालबालिका छन्।
बिरामीहरूलाई तत्काल प्रादेशिक अस्पताल भद्रपुर लगिएको थियो। प्रारम्भिक उपचारपछि नौ जनालाई थप उपचारका लागि दमकस्थित बाल अस्पताल पठाइएको छ।
सूचना अधिकारी खड्काका अनुसार दुई जनाको अवस्था मध्यम छ। बाँकीको अवस्था सामान्य रहेको छ।
प्रहरीले अपरिचित जङ्गली च्याउ नखान सर्वसाधारणलाई आग्रह गरेको छ। जङ्गली च्याउ विषाक्त हुनसक्ने र स्वास्थ्य जोखिम बढाउने प्रहरीको भनाइ छ।
