म्याग्दीको दाना–राहुघाट खण्डमा क्षतिग्रस्त कालीगण्डकी करिडोर २२० केभी प्रसारणलाइन २१ दिनपछि सञ्चालनमा आएको छ। गत असोज ११ गतेको अविरल वर्षा र कालीगण्डकी नदीको कटानले यो खण्डमा क्षति पुगेको थियो।
नेपाल विद्युत् प्राधिकरणले आपत्कालीन पुनःस्थापना प्रणाली (इआरएस) टावर प्रयोग गरी शनिबार राति सवा १० बजे २२० केभीको एउटा सर्किट चार्ज गरेर लाइन अस्थायी रूपमा सञ्चालनमा ल्याएको हो। बाढीले म्याग्दीको अन्नपूर्ण गाउँपालिका–६, पोखरेबगरस्थित प्रसारण लाइनका चारवटा टावरमा क्षति पुर्याएको थियो।
टावर नम्बर २१, २३ र २४ पूर्ण रूपमा भत्किएका थिए भने २२ नम्बरको टावरमा आंशिक क्षति पुगेको थियो। प्रसारण लाइन अवरुद्ध हुँदा दाना सबस्टेसनमार्फत राष्ट्रिय प्रणालीमा जोडिएका निजी क्षेत्रका पाँच जलविद्युत् आयोजनाबाट उत्पादित कुल १७० मेगावाट विद्युत् प्रवाह हुन सकेको थिएन।
लाइन सञ्चालनमा आएसँगै ती आयोजनाहरूबाट उत्पादित विद्युत् पुनः राष्ट्रिय प्रसारण प्रणालीमा जोडिएको छ। कालीगण्डकी र यसका सहायक नदीमा निर्माण हुने जलविद्युत् आयोजनाबाट उत्पादित विद्युत् एकीकृत गरी राष्ट्रिय प्रणालीमा प्रवाह गर्ने उद्देश्यले यो डबल सर्किट प्रसारण लाइन निर्माण गरिएको हो।
यस प्रसारण लाइनले करिब १ हजार २०० मेगावाट विद्युत् प्रवाह गर्न सक्ने क्षमता राख्छ। स्थायी टावर निर्माण सम्पन्न भएपछि दाना–राहुघाट खण्ड नियमित अवस्थामा सञ्चालनमा आउनेछ।
