कालिकोटको पलाँता अस्पतालमा चिकित्सक र नर्समाथि कुटपिट तथा तोडफोड गर्ने तीन जना पक्राउ परेका छन्। जिल्ला प्रहरी कार्यालय कालिकोटले घटनाको अनुसन्धान अगाडि बढाएको छ।
पक्राउ पर्नेमा पलाँता गाउँपालिका–९ का सुशील बम, मैना बम र तपेन्द्र बम छन्। प्रहरी नायब उपरीक्षक हिमबहादुर खत्रीका अनुसार सुशील र मैना बमले शुक्रबार दिउँसो मेडिकल अधिकृत डा अली हैदर रैन र नर्स शान्ता गिरीमाथि कुटपिट तथा दुर्व्यवहार गरेका थिए।
तपेन्द्र बमले राति अस्पताल प्रवेश गरी अहेब विष्णु रोकाया र सुरक्षा गार्ड दर्नडनसमेतलाई कुटपिट गर्नुका साथै अस्पतालमा तोडफोड गरेका थिए। तोडफोडबाट भिडियो स्क्यान मेसिन, भ्याक्सिन फ्रिज, पङ्खा, अस्पतालका झ्याल, फार्मेसीका दराज र ¥याकमा क्षति पुगेको छ।
प्रहरीले तीनै जनालाई नियन्त्रणमा लिई अनुसन्धान गरिरहेको छ। अस्पतालभित्र भिडियो गेम खेल्न नदिएको विषयमा सुरु भएको विवादले उग्र रूप लिएपछि स्वास्थ्यकर्मीमाथि आक्रमण र अस्पताल तोडफोड भएको जनाइएको छ। घटनामा संलग्न एक बालकलाई पनि प्रहरीले नियन्त्रणमा लिएको छ।
