कालीकोटको सान्नीत्रिवेणी गाउँपालिका–४ मा भारतीय सरकारको करिब ९ करोड ३० लाख रुपैयाँ सहयोगमा जनज्योति माध्यमिक विद्यालयको नयाँ भवन निर्माणको शिलान्यास गरिएको छ। यो परियोजना उच्च प्रभाव सामुदायिक विकास परियोजना (एचआईसीडीपी) अन्तर्गत बन्नेछ। सान्नीत्रिवेणी गाउँपालिकाले परियोजना कार्यान्वयन गर्नेछ। यो कालीकोट जिल्लामा सञ्चालित पहिलो एचआईसीडीपी परियोजना हो।
शिलान्यास कार्यक्रममा सान्नीत्रिवेणी गाउँपालिकाका अध्यक्ष र स्थानीय सरोकारवालाहरूले भारतीय सरकारको विकास सहयोगको प्रशंसा गरे। नयाँ पूर्वाधारले विद्यार्थी र शिक्षकका लागि गुणस्तरीय सिकाइ वातावरण निर्माणमा सहयोग पुग्ने विश्वास व्यक्त भयो।
नेपालका लागि भारतीय राजदूत नवीन श्रीवास्तवले भिडियो सन्देशमार्फत परियोजनाको सफल कार्यान्वयनका लागि शुभकामना दिए। उनले नेपाल सरकार र नेपाली जनतासँग मिलेर साझा विकास र समृद्धिका लागि काम गर्ने भारत सरकारको प्रतिबद्धता दोहोर्याए।
भारतीय दूतावासका अनुसार हालसम्म एचआईसीडीपी कार्यक्रमअन्तर्गत नेपालका सातै प्रदेश र ७४ जिल्लामा करिब ६०० परियोजना सञ्चालन भएका छन्। तीमध्ये १८ परियोजना कर्णाली प्रदेशमा रहेका छन्।
यसअघि भारत सरकारले कालीकोट जिल्लामा ४ वटा एम्बुलेन्स र २ वटा विद्यालय बस उपलब्ध गराइसकेको छ। कर्णाली प्रदेशका स्वास्थ्य तथा शैक्षिक संस्थाहरूलाई हालसम्म ५६ वटा एम्बुलेन्स र १४ वटा विद्यालय बस उपहारस्वरूप प्रदान गरिएको दूतावासले जनाएको छ।
भारतीय दूतावासले नेपाल–भारतबीचको विकास सहकार्यलाई सुदृढ बनाउन यस्ता परियोजनाले स्थानीय पूर्वाधार विकास तथा समृद्धिमा योगदान पुर्याउने विश्वास व्यक्त गरेको छ।
