सिरहा । पूर्व–पश्चिम हुलाकी राजमार्गअन्तर्गत सिरहा र धनुषा जोड्ने कमला नदीमाथिको पुल निरीक्षणमा पुगेका भौतिक पूर्वाधार मन्त्री सुनिल लम्सालसँग स्थानीयले आक्रोश पोखेका छन्। शनिबार साँझ पुलस्थल पुगेका मन्त्री लम्सालले निर्माण छिटो सम्पन्न गर्न निर्देशन दिए। तर, पुल कहिले पूरा हुन्छ वा नयाँ योजना आउँछ भन्ने स्पष्ट धारणा नआएपछि स्थानीय युवा विरोधमा उत्रिए।
स्थानीयका अनुसार पुल निर्माणको भविष्यबारे प्रश्न गर्दा मन्त्रीबाट ठोस जवाफ नआएपछि युवाले नाराबाजी गरे। मन्त्रीको टोली फर्किने क्रममा ‘फोटो खिचाउन मात्र होइन, जवाफ पनि दिनुपर्छ’ र ‘मधेशलाई उपेक्षा गर्न पाइँदैन’ जस्ता नारा लागे। करिब १५ वर्षदेखि अलपत्र रहेको कमला पुलको अवस्था बुझ्न यसअघि पनि विभिन्न प्रधानमन्त्री र मन्त्रीहरू पटक–पटक पुगे। तर, निर्माण कार्य अझै पूरा हुन सकेको छैन।
हुलाकी कमला पुल संघर्ष समितिका संयोजक इन्जिनियर प्रविन यादवले मन्त्री लम्सालले ‘हामी बोल्न होइन, काम गर्न आएका हौं, काम गरेर देखाउँछौं’ भनेको बताए। तर, पुल निर्माणको समयसीमा र योजनाबारे कुनै ठोस प्रतिबद्धता नआएपछि स्थानीय आक्रोशित बने। जिल्ला प्रहरी कार्यालय सिरहाका प्रमुख एसपी बासुदेव पाठकले सामान्य नाराबाजी भएको स्वीकार गरे। मन्त्रीको सवारीमा कुनै अवरोध नभएको उनले बताए।
