समस्याग्रस्त सहकारी व्यवस्थापन समितिको कार्यालयले कान्तिपुर सेभिङ एण्ड क्रेडिट सहकारी संस्था लिमिटेडका १०० ऋणीको नामावली सार्वजनिक गरेको छ। जेठ २० गतेको निर्णयअनुसार ऋण चुक्ता नगर्नेहरूको सूची सार्वजनिक गर्दै तत्काल दायित्व पूरा गर्न अल्टिमेटम दिइएको हो।
समितिले उपलब्ध ऋण विवरणका आधारमा यो नामावली सार्वजनिक गरेको जनाएको छ। यस प्रक्रियामा साविकमा ऋण चुक्ता गरिसकेका तर नामावलीमा नाम समावेश भएका व्यक्तिहरूलाई उचित प्रमाणसहित कार्यालयमा उपस्थित हुन आग्रह गरिएको छ।
‘यदि ऋण चुक्ता भइसकेको हो भने आधिकारिक प्रमाणसहित उपस्थित हुनुहोला, अन्यथा विवरणअनुसारकै कारबाही प्रक्रिया अघि बढ्नेछ,’ समितिले भनेको छ।
ऋण तिर्न बाँकी ऋणीहरूलाई समितिको कार्यालयमा सम्पर्क गरी यथाशीघ्र बक्यौता चुक्ता गर्न सूचित गरिएको छ। तोकिएको समयभित्र ऋण नबुझाए प्रचलित कानुनअनुसार जायजेथा जफत र अन्य कानुनी असुली प्रक्रिया कडा रूपमा अघि बढाइने समितिले चेतावनी दिएको छ।
समस्याग्रस्त सहकारीको रकम फिर्ता गराई बचतकर्ताको हित संरक्षण गर्ने उद्देश्यले ऋणीहरूको विवरण सार्वजनिक गरिएको समितिले स्पष्ट पारेको छ। वर्षौंदेखि बचत फिर्ता नपाएर छटपटिएका सर्वसाधारणको रकम असुल गर्न समितिले ऋणीहरूमाथि कडाइ सुरु गरेको हो।
