सुनसरीको देवानगञ्ज गाउँपालिका–३ कप्तानगञ्जमा दुई समुदायबीच झडप भएको घटनाको सत्यतथ्य केलाउन गृह मन्त्रालयको टोली घटनास्थल पुगेको छ। सहसचिव भूपेन्द्र थापा नेतृत्वको पाँच सदस्यीय समितिले स्थलगत अध्ययन सुरु गरेको छ।
आइतबार राति झडप नियन्त्रण गर्ने क्रममा प्रहरीको गोली लागि ३० वर्षीय ओमप्रकाश मेहताको मृत्यु भएको थियो। नौ जना घाइते भएका थिए। घटनापछि स्थानीय क्षेत्रमा तनाव बढेको थियो।
समितिका सदस्यहरूले मृतक मेहताको परिवारसँग भेटघाट गरी जानकारी लिएका छन्। सहसचिव थापाले स्थलगत प्रतिवेदनमा सबै माग समेटेर सुझावसहित गृह मन्त्रालयमा बुझाउने बताए।
यसअघि सोमबार विराटनगरमा घाइतेहरूसँग प्रारम्भिक भेटघाट गरिएको थियो। बुधबार बिहान टोली कप्तानगञ्ज पुगेर घटनास्थलको निरीक्षण गरेको छ। टोलीले घटनाको पृष्ठभूमि, सुरक्षा निकायको भूमिका र उत्पन्न परिस्थितिबारे अध्ययन गरी प्रतिवेदन तयार गर्नेछ।
