कप्तानगन्ज गोलीकाण्डमा ज्यान गुमाएका दुई युवाको शव पोस्टमार्टमपछि परिवारलाई बुझाइएको छ। देवानगन्ज–४ का २५ वर्षीय ओमप्रकाश मेहता र देवानगन्ज–३ का २२ वर्षीय जयप्रकाश मेहताको शव शुक्रबार कोशी अस्पतालमा पोस्टमार्टम गरिएको थियो। दुवैको शव विराटनगरस्थित न्युरो अस्पतालको शवगृहमा राखिएको थियो।
मोरङ प्रहरी प्रमुख एसपी कवित कटवालले पोस्टमार्टमपछि कानुनी प्रक्रिया पूरा गरी शव परिवारलाई बुझाइएको पुष्टि गरे। बिहीबार राति सरकार र पीडित पक्षबीच सहमति जुटेको थियो।
गृहमन्त्री सुधन गुरुङको उपस्थितिमा देवानगन्ज गाउँपालिका कार्यालयमा भएको छलफलपछि सरकार र पीडित पक्षबीच सहमति भएको हो। सहमतिअनुसार सरकारले दुवै मृतकलाई सहिद घोषणा गर्ने प्रक्रिया अघि बढाउनेछ। प्रतिपरिवार १० लाख रुपैयाँ राहत, मृतकका परिवारका एक सदस्यलाई रोजगारी, छानबिन समितिको प्रतिवेदन कार्यान्वयन र स्मृति पार्क निर्माणको प्रतिबद्धता सरकारले जनाएको छ। दोषीमाथि कानुनबमोजिम कारबाही हुनेछ।
सहमतिपत्रमा ओमप्रकाशका बुवा कृष्णदेव मेहता र जयप्रकाशका तर्फबाट नरेश मेहताले हस्ताक्षर गरेका छन्। सरकारका तर्फबाट गृहमन्त्री गुरुङले हस्ताक्षर गरे।
गत आइतबार राति कप्तानगन्जमा दुई पक्षबीचको विवाद हिंसात्मक बनेपछि सशस्त्र प्रहरीले गोली चलाएको थियो। गोली लागेर गम्भीर घाइते भएका ओमप्रकाशको सोही राति मृत्यु भएको थियो। जयप्रकाशको उपचारका क्रममा बिहीबार मृत्यु भएको थियो।
प्रहरीका अनुसार घटनामा गोली लागेर १० युवा घाइते भएका थिए। आठ जनाको विभिन्न अस्पतालमा उपचार भइरहेको छ। सुरक्षाकर्मीसहित २२ जनाभन्दा बढी घाइते भएका थिए।
गोलीकाण्डपछि सुनसरीका विभिन्न स्थानमा आगजनी र तोडफोड भएका थिए। स्थानीय प्रशासनले कफ्र्यु आदेश जारी गरेको थियो। सिरहामा भएको प्रदर्शनका क्रममा एक किशोरको मृत्यु भएको थियो।
