कपिलवस्तुको कृष्णनगरबाट प्रहरीले १५ किलोभन्दा बढी चरेस र अफिमसहित पाँच महिलालाई पक्राउ गरेको छ। कृष्णनगर नगरपालिका–२ पुरानो बसपार्क क्षेत्रबाट भारततर्फ लैजाँदै गरेको अवस्थामा उनीहरूलाई प्रहरीले नियन्त्रणमा लिएको हो।
गस्तीमा रहेको प्रहरी टोलीले शंकास्पद पाँच जनालाई रोकी जाँच गर्दा उनीहरूको साथबाट पाँच किलो २२५ ग्राम चरेस र १० किलो अफिम बरामद गरेको छ। उनीहरूका साथबाट पाँच थान मोबाइलसमेत नियन्त्रणमा लिइएको छ।
पक्राउ पर्नेमा दाङका रजिता रोकाय र विमला पुन, कपिलवस्तुका पनिसरा सारु र नन्सरी घर्ती मगर, तथा पर्साकी चुमा लामिछाने छिन्।
जिल्ला प्रहरी कार्यालय, कपिलवस्तुका प्रहरी नायब उपरीक्षक रिपेन्द्रकुमार सिंहका अनुसार पक्राउ परेकामाथि लागूऔषधसम्बन्धी कसुरमा अनुसन्धान अघि बढाइएको छ। बरामद पदार्थको परीक्षण तथा घटनामा संलग्न अन्य व्यक्ति र सम्भावित सञ्जालबारे अनुसन्धान भइरहेको छ।
