काठमाडौंमा सार्वजनिक स्थानमा मधेश समुदायलाई लक्षित गर्दै आपत्तिजनक नारा लेखेको आरोपमा प्रहरीले ३५ वर्षीय विशाल गुरुङलाई पक्राउ गरेको छ। सामाजिक सद्भावमा खलल पुर्याउने र द्वन्द्व भड्काउने उद्देश्यले यस्ता अभिव्यक्ति लेखिएको प्रहरीको भनाइ छ।
जिल्ला प्रहरी परिसर काठमाडौं र प्रहरी वृत्त नयाँ बानेश्वरको टोलीले आइतबार खोटाङको बाक्सिला घर भई हाल काठमाडौं–३१ शङ्खमुल बस्दै आएका गुरुङलाई शङ्खमूलबाट पक्राउ गरेको हो। उनलाई सार्वजनिक शान्ति खलल पार्न नहुने कसुरमा नियन्त्रणमा लिइएको छ।
प्रहरी वृत्त बानेश्वरबाट गुरुङमाथि थप अनुसन्धान भइरहेको जिल्ला प्रहरी परिसर काठमाडौंका प्रवक्ता तथा सूचना अधिकारी दानबहादुर थापाले जानकारी दिएका छन्।
