कोहलपुर नगरपालिका क्षेत्रभित्रका सामुदायिक र संस्थागत विद्यालयहरू अत्यधिक गर्मीका कारण आज (जेठ २५ गते) देखि तीन दिनसम्म बन्द गरिएका छन्। नगरपालिकाको शिक्षा तथा खेलकुद शाखाले विद्यार्थीहरूको स्वास्थ्यलाई मध्यनजर गर्दै यो निर्णय गरेको हो।
कोहलपुर नगरपालिकाका शिक्षा तथा खेलकुद शाखा प्रमुख रविलाल मिजारका अनुसार, जेठ २५ देखि २७ गतेसम्म विद्यालयहरूमा नियमित पठनपाठन स्थगन गरिएको छ। यो अवधिमा कुल ३३ सामुदायिक र ५० संस्थागत विद्यालय प्रभावित हुनेछन्।
मिजारले वर्षा भएर गर्मी घट्ने अवस्था आएमा तीन दिनमै बिदा सकिने, नभए थप दुई दिन बिदा थपिन सक्ने बताए। उच्च तापक्रम र तातो हावाका कारण विद्यार्थीहरूको स्वास्थ्यमा प्रतिकूल असर पर्न सक्ने सम्भावनालाई ध्यानमा राखेर यो कदम चालिएको हो।
जल तथा मौसम विज्ञान कार्यालय, कोहलपुरका अनुसार, आज कोहलपुरमा अधिकतम तापक्रम ३९.४ डिग्री सेल्सियस रेकर्ड भएको छ। यसैगरी, नेपालगन्जमा ३९.२ र खजुरामा ३८.८ डिग्री सेल्सियस तापक्रम मापन गरिएको छ। मौसममा तत्काल सुधार आउने सम्भावना नदेखिएको र तापक्रम बढ्दो क्रममा रहेकाले विद्यार्थी सुरक्षालाई प्राथमिकता दिइएको छ।
