कोरियाली भाषा परीक्षा पास गरेर पनि रोजगारीमा जान नपाएका युवाहरूले २०८० पुस १३ गते ललितपुरको बालकुमारीमा गरेको आन्दोलन प्रहरीको गोली लागेर दुईको मृत्युमा टुंगियो। सिप विल्डिङतर्फ आवेदन दिएर भाषा परीक्षा दिएकालाई अन्य क्षेत्रमा जान नपाउने नियमले आन्दोलन चर्केको थियो।
इजरायलमा केयरगिभरका लागि छनोटमा परेर पनि लक्की ड्रमा नपरेका १ हजार १ सय ५३ जना युवाहरूले आफूहरूलाई लैजानुपर्ने माग राख्दै विरोध प्रदर्शन गरिरहेका छन्। विगतमा लक्की ड्रमा नपरेका ४ सय बढीलाई विशेष प्रक्रियाबाट लगिएको नजिर उनीहरूले देखाएका छन्।
युवा, श्रम तथा रोजगार मन्त्रालयले दुवै देशको कानुनी प्रणाली र नीति कारण माग सम्बोधन गर्न नसकिने स्पष्ट पारेको छ। प्रवक्ता पिताम्बर घिमिरेले कोरियाको ईपीएस प्रणाली र इजरायलको छनोट प्रक्रिया परिवर्तन नहुने बताए।
मन्त्रालयले इजरायल जान पाउनुपर्ने माग राख्नेहरूलाई नयाँ विज्ञापनमा सहभागी हुन भनेको छ। दुवै देशसँगको सम्झौता र आन्तरिक नीति बाधक रहेकाले प्रणालीभन्दा बाहिर गएर कसैलाई पठाउन नसकिने मन्त्रालयको अडान छ।
