विराटनगर। कोशी प्रदेशका मुख्यमन्त्री हिक्मतकुमार कार्की र गण्डकी प्रदेशका मुख्यमन्त्री सुरेन्द्र पाण्डेबीच आज विराटनगरमा भेटवार्ता भएको छ। दुई प्रदेशबीच पर्यटन प्रवर्द्धन र आर्थिक समृद्धिका लागि सम्भावित सहकार्यका विषयमा छलफल केन्द्रित थियो।
भेटका क्रममा विराटनगरबाट पोखराका लागि हवाई सेवा सञ्चालन गर्ने विषयले प्राथमिकता पाएको छ। यसका साथै, पोखरा आउने पर्यटकलाई कोशी प्रदेशमा माउन्टेन फ्लाइटमार्फत हिमालको दृश्यावलोकन गराउने जस्ता पर्यटन पूर्वाधार र प्रवर्द्धनका योजनामा पनि दुई मुख्यमन्त्रीबीच कुराकानी भएको छ। दुवै प्रदेश पर्यटनका लागि महत्त्वपूर्ण रहेको र यस क्षेत्रमा जोड दिन सके आर्थिक समृद्ध हासिल गर्न सकिनेमा मुख्यमन्त्रीहरूले विश्वास व्यक्त गरेका छन्।
गण्डकी प्रदेशका मुख्यमन्त्री पाण्डे आज व्यक्तिगत भ्रमणका सिलसिलामा विराटनगर आएको कोशी प्रदेशका मुख्यमन्त्रीका प्रमुख स्वकीय सचिव जीवनकुमार कार्कीले जानकारी दिए।
