मोरङ प्रशासनले उपभोक्ता ठगीमा संलग्न कोशी ग्यास उद्योगलाई २ लाख ९० हजार रुपैयाँ जरिवाना गरेको छ। बुढीगंगा गाउँपालिका–४ मा रहेको उद्योगले सिलिन्डरमा तोकिएको तौलभन्दा कम ग्यास भरेर ठगी गरेको पाइएको छ।
अनुगमन टोलीले १४३ सिलिन्डरमध्ये ६४ वटाको तौल परीक्षण गर्दा एउटामा १३.७४५ केजी ग्यास भेटिएको थियो। अन्य सिलिन्डरमा पनि मापदण्डभन्दा कम ग्यास पाइएको थियो। खाली सिलिन्डरको तौलमा पनि १०० देखि १५० ग्राम बढी भेटिएको थियो। यसले उपभोक्तालाई ठगी गरेको पुष्टि भएको छ।
अत्यावश्यक सेवा अन्तर्गत पर्ने ग्यास उद्योग अनुगमनका दिन बन्द पाइएकाले कोशी ग्यास उद्योगविरुद्ध थप कारबाही प्रक्रिया अघि बढाइएको छ।
यसैगरी, विराटनगर महानगरपालिका–७ को श्रीकृष्ण ट्रेडर्सलाई अनुगमन टोलीलाई सहयोग नगरेको भन्दै ११ हजार रुपैयाँ जरिवाना गरिएको छ।
जिल्ला प्रशासन कार्यालय मोरङले ग्यास वितरण व्यवस्थित गर्न र ठगी रोक्न अनुगमन कडा पारेको छ। यस्ता अनियमितता पाइएमा कडा कारबाही गरिने प्रशासनले चेतावनी दिएको छ।
