विराटनगर। कोशी प्रदेशको मुख्यमन्त्री हिक्मतकुमार कार्कीलाई हटाएर नयाँ व्यक्तिलाई मुख्यमन्त्री बनाउने प्रस्तावमा नेकपा (एमाले) र नेकपा (माओवादी केन्द्र)का नेताबीच आइतबार विराटनगरमा छलफल भएको छ। एमालेका केन्द्रीय सचिव एवं कोशी प्रदेश इञ्चार्ज शेरधन राईले कार्कीलाई राजीनामा दिन आग्रह गरे।
माओवादी केन्द्र कोशी प्रदेश संसदीय दलका नेता इन्द्रबहादुर आङ्बोले एमालेभित्र मुख्यमन्त्री चयनको विषयमा ठोस निर्णय नभएसम्म आफ्नो पार्टी सरकारमा सहभागी नहुने बताए। एमाले अध्यक्ष केपी शर्मा ओलीले वर्तमान मुख्यमन्त्री कार्कीको स्थानमा तिलकुमार मेन्याङ्बोलाई ल्याउन चाहेको स्रोतको दाबी छ।
यही पृष्ठभूमिमा राई र आङ्बोबीच मुख्यमन्त्री परिवर्तनको संवैधानिक र कानुनी प्रक्रियाबारे समेत छलफल भएको थियो। राईले मुख्यमन्त्री परिवर्तनको निर्णय पार्टीको भएको र यसमा सचिवालयको निर्णय आवश्यक नभएको भन्दै विगतमा पनि अध्यक्षले नै यस्ता निर्णय गरेको अभ्यास रहेको बताए।
आङ्बोले एमालेभित्रको आन्तरिक विवाद पार्टीभित्रै समाधान गर्न सुझाव दिए। उनले मुख्यमन्त्रीको विषयलाई संसद्मा लैजानु उचित नहुने धारणा राखे। मुख्यमन्त्री कार्कीविरुद्ध एमालेकै तर्फबाट अविश्वासको प्रस्ताव आउन सक्ने चर्चा चलिरहेका बेला आङ्बोको यो भनाइलाई अर्थपूर्ण रूपमा हेरिएको छ।
कोशी प्रदेशमा एमालेभित्रको विवादकै कारण नेपाली कांग्रेसले पनि आफ्ना मन्त्रीहरूलाई सरकारबाट फिर्ता बोलाएको छैन। एमालेले औपचारिक जानकारी नगराएको र केन्द्रबाट स्पष्ट निर्देशन नआएको भन्दै कांग्रेसका मन्त्रीहरू सरकारमै रहेका छन्।
मुख्यमन्त्री कार्की संविधानको धारा १६८ को उपधारा (५) बमोजिम नियुक्त भएकाले उनले स्वयं राजीनामा नदिएसम्म वा उनीविरुद्ध ४७ जना प्रदेशसभा सदस्यको समर्थनमा अविश्वास प्रस्ताव दर्ता नभएसम्म पदबाट हटाउन सहज छैन। यसले गर्दा कोशी प्रदेशमा नयाँ गठबन्धन गठन र मुख्यमन्त्री परिवर्तन तत्काल हुने सम्भावना कम देखिन्छ।
कांग्रेसले पनि मुख्यमन्त्री कार्कीलाई आवश्यक समर्थन जुटाउन सके सहयोग गर्ने संकेत दिएको छ। प्रदेशसभामा कांग्रेसका २९ सांसद छन्। यदि कार्कीले एमालेका ४० सांसदमध्ये कम्तीमा १८ जनाको समर्थन कायम राख्न सकेमा उनी मुख्यमन्त्री पदमा टिकिरहने राजनीतिक विश्लेषण गरिएको छ।
