असार ३२ गते देशभर १०,९६८ जग्गा किनबेच भई घरजग्गा कारोबारको ऐतिहासिक रेकर्ड कायम भएको छ। साउन १ देखि लागू हुने पुँजीगत लाभकर वृद्धि हुनुअघि कारोबार गर्नेको भीडले यो रेकर्ड तोडेको हो। भूमि व्यवस्थापन विभागका अनुसार उक्त दिन १३६ मालपोत कार्यालय र ६ नगरपालिकाबाट कारोबार सम्पन्न भएको थियो।
विभागका सूचना प्रविधि प्रमुख बलराम काफ्लेले उपलब्ध अभिलेखमा यो एकै दिनको सर्वाधिक कारोबार भएको बताए। ‘हामीसँग रहेको रेकर्डअनुसार असार ३२ गतेको कारोबार अहिलेसम्मकै उच्च हो। यसअघि एकै दिन १० हजारभन्दा बढी कारोबार भएको अभिलेख छैन,’ काफ्लेले भने।
सोही दिन सरकारले १ अर्ब ७३ करोड ७७ लाख २५ हजार ७८८ रुपैयाँ राजस्व संकलन गरेको छ। अघिल्लो दिन असार ३१ गते १०,१८२ जग्गा किनबेच हुँदा १ अर्ब १८ करोड ९९ लाख ६५ हजार ७६४ रुपैयाँ राजस्व संकलन भएको थियो।
सरकारले साउन १ देखि जग्गा बिक्रीमा लाग्ने पुँजीगत लाभकर बढाएपछि कारोबार बढेको हो। नयाँ व्यवस्थाअनुसार पाँच वर्षभन्दा बढी स्वामित्वको जग्गामा ७.५ प्रतिशत र पाँच वर्ष नपुगेकोमा १० प्रतिशत लाभकर लाग्नेछ। यसअघि यो क्रमशः ५ र ७.५ प्रतिशत थियो।
हाल मेलम्ची, शिवसताक्षी, चौदण्डीगढी, भूम्लु, कन्काई र मनोहरा–कागेश्वरी नगरपालिकाबाट पनि घरजग्गा किनबेच सेवा पाइन्छ। यी स्थानीय तहका सेवाग्राहीले मालपोत कार्यालय धाउनुपर्ने झन्झट हटेको छ।
विभागका अनुसार चालु आर्थिक वर्ष २०८२/८३ को सुरुवातमै कारोबार सुस्त रहे पनि भदौपछि बजारमा सुधार देखिएको थियो। गत भदौ २३ र २४ गते जेन–जी आन्दोलनले २२ मालपोत र १४ नापी कार्यालयमा आगजनी तथा तोडफोड भएको थियो। पाँच मालपोत र आठ नापी कार्यालय पूर्ण क्षतिग्रस्त भएका थिए। क्षति भएका सबै कार्यालय पुनः सञ्चालनमा आइसकेका छन्।
