संयुक्त राष्ट्रसंघीय जनसंख्या कोष (युएनएफपीए) र सञ्चारिका समूह नेपालले शुक्रबार आयोजना गरेको एक कार्यक्रममा महिला, कानुन र विकास मञ्चका अध्यक्ष तथा अधिवक्ता सबिन श्रेष्ठले नेपालमा ‘लिभिङ टुगेदर’ सम्बन्धमा महिलाको अत्यधिक शोषण भइरहेको बताएका छन्।
श्रेष्ठका अनुसार, महिलाहरुले लिभिङ सम्बन्धलाई विवाह नै मान्ने गरेका छन्, तर पुरुषहरुको हकमा भने यो गम्भीर नभएको पाइएको छ। सँगै बस्दाबस्दै गर्भ रहन गएमा लिभिङमा बस्ने अधिकांश पुरुषले विवाह गर्ने नभएर असुरक्षित गर्भपतनलाई जोड दिएको पाइन्छ। यसले महिलाको प्रजनन् अधिकार, स्वास्थ्य र आत्मसम्मानमा प्रहार भएको छ।
अधिवक्ता श्रेष्ठले नेपालमा ‘लिभिङ टुगेदर’ को सम्बन्धमा महिलाहरु अत्यधिक शोषणमा परेका कारण कानूनी जटिलतालाई सम्बोधन गर्नुपर्ने माग गरे। उनले महिलाहरुको प्रजनन् अधिकारमाथि राज्यलेनै नै अनदेखा गरेको आरोप लगाए, जसको एक उदाहरणका रुपमा नेपालमा गोप्य रुपमा सरोगेट हुने गरेको उल्लेख गरे।
