सिराहामा झडपका क्रममा एक किशोरको गोली लागेर मृत्यु भएको घटनाले तराईका बालबालिकाको असुरक्षालाई उजागर गरेको छ। यसपछि बालबालिका शान्ति क्षेत्र राष्ट्रिय अभियान (सिजप) ले बालअधिकार सुनिश्चित गर्न तत्काल प्रभावकारी कदम चाल्न सरकार, राजनीतिक दल र सरोकारवालालाई आग्रह गरेको छ।
सिजपले बिहीबार जारी गरेको विज्ञप्तिमा सिराहा घटनाप्रति गहिरो दुःख व्यक्त गरिएको छ। हिंसात्मक घटनामा बालबालिका अग्रपंक्तिमा देखिनु चिन्ताजनक विषय भएको विज्ञप्तिमा उल्लेख छ।
कर्फ्यू र निषेधाज्ञाका बेला बालबालिकालाई घरभित्रै सुरक्षित राख्न अभिभावकलाई विशेष सतर्कता अपनाउन आग्रह गरिएको छ। बालबालिकालाई हिंसा, द्वन्द्व र राजनीतिक गतिविधिबाट टाढा राख्न माग गरिएको छ। घटनाको निष्पक्ष छानबिन गरी दोषीमाथि कानुनी कारबाही हुनुपर्नेमा जोड दिइएको छ।
हिंसाबाट प्रभावित बालबालिका र परिवारलाई मनोसामाजिक परामर्श, संरक्षण र सहयोग उपलब्ध गराउन पनि सिजपले आग्रह गरेको छ।
अभियानका अध्यक्ष तिलोत्तम पौडेलले विद्यालय, सार्वजनिक स्थान र समुदायलाई बालबालिकाका लागि सुरक्षित क्षेत्र कायम राख्नु सबैको साझा जिम्मेवारी भएको बताए। उनले बालबालिकाको सर्वोत्तम हितलाई केन्द्रमा राखी संयम, संवाद र शान्तिपूर्ण उपाय अवलम्बन गर्न आह्वान गरेका छन्।
