मधेश प्रदेशमा चार महिनादेखि रेबिजविरुद्धको खोप (एआरभी) को चरम अभाव छ। कुकुर तथा अन्य जनावरको टोकाइबाट प्रभावित बिरामी सरकारी अस्पतालमा निःशुल्क खोप नपाएर निजी मेडिकलबाट महँगोमा किन्न बाध्य भएका छन्।
प्रदेशका ४४ सरकारी अस्पताल र स्वास्थ्य संस्थामा फागुनदेखि एन्टिरेबिज खोप आपूर्ति ठप्प छ। नगर अस्पताल लालबन्दीका मेडिकल सुपरिन्टेन्डेन्ट डा. चन्दन चौधरीले समस्या पुरानै भए पनि पछिल्लो समय जटिल बनेको बताए। प्रदेश स्वास्थ्य आपूर्ति व्यवस्थापन केन्द्रले मासिक १२० भाइल कोटा तोके पनि पर्याप्त आपूर्ति नभएको उनको भनाइ छ।
डा. चौधरीले स्वास्थ्य मन्त्रालय र सम्बन्धित निकायमा पटकपटक पत्राचार गर्दा पनि खोप आपूर्ति नभएको बताए। प्रादेशिक अस्पताल मलङ्गवाका निमित्त मेडिकल सुपरिन्टेन्डेन्ट डा. रामप्रकाश साहले खोप अभावले बिरामीको गुनासो बढेको र उनीहरूले प्रशासनप्रति आक्रोश व्यक्त गर्ने गरेको उल्लेख गरे।
स्वास्थ्य अधिकारीहरूका अनुसार ४४ स्वास्थ्य संस्थाका लागि मासिक करिब ७,५०० भाइल खोप आवश्यक पर्छ। सङ्घीय सरकारले आवश्यकताअनुसार आपूर्ति नगर्दा अभाव छ। कहिले २,०००, कहिले २,५०० त कहिले ५,००० भाइल मात्र पठाइने गरेको छ।
प्रदेश स्वास्थ्य आपूर्ति व्यवस्थापन केन्द्र जनकपुरका निमित्त निर्देशक डा. नागेन्द्रप्रसाद यादवले चालु आर्थिक वर्षमा प्रदेश सरकारले खरिद गरेको ७५९ भाइल खोप पनि सकिएको बताए। सङ्घीय स्तरमै आपूर्ति समस्या रहेकाले अभाव चर्किएको र आपूर्तिकर्ताबाट समयमा खोप नपाउँदा समस्या थपिएको उनको भनाइ छ।
