काठमाडौं । स्वतन्त्र सांसद महावीर पुनले बाँदर आतङ्क कम गर्ने कुनै वैज्ञानिक प्रविधि हालसम्म संसारमा नभएको बताएका छन्। प्रतिनिधिसभाको बैठकमा बोल्दै उनले रकेट बनाउनु सजिलो भए पनि बाँदर भगाउने प्रविधि नभएको बताए।
सांसद पुनले आफूले सात वर्षदेखि यस विषयमा अनुसन्धानको प्रयास गर्दा पनि सफल नभएको उल्लेख गरे। उनले राष्ट्रिय आविष्कार केन्द्रले यसका लागि ५०-६० लाख रुपैयाँ लगानी गर्न खोजेको र हरेक गाउँपालिकालाई एक-एक लाख रुपैयाँ उठाएर अनुसन्धानमा जोडिन आग्रह गरेको स्मरण गराए।
“यहाँ संसद्मा कराएर मात्रै बाँदर आतङ्क कम हुँदैन,” उनले भने, “बरु रकेट बनाउन सजिलो छ, प्रविधि छ। तर बाँदर भगाउने प्रविधि मैले संसारभर खोजेको हो, छँदै छैन।” उनले यसको अनुसन्धानका लागि छुट्टै खर्च छुट्याउनुपर्ने आवश्यकता औंल्याए।
सांसद पुनले बाँदर आतङ्क कम गर्ने उपायबारे अनुसन्धान गर्न सरकारले एउटा टोली गठन गर्न लागेको र सो टोलीमा आफूलाई पनि समेट्न आग्रह गरेको जानकारी दिए। उनले कुनै पनि वैज्ञानिकले यसको प्रभावकारी समाधान पत्ता लगाउन नसकेको र एउटा उपायले मात्र काम नहुने बताए।
सांसद पुनले यस्तो बताइरहँदा संसद् बैठकमा केही सांसदले हाँसेका थिए। राप्रपाकी सांसद खुश्बु ओलीले किसानको पीडामाथि हाँसेको भन्दै सांसदहरूको व्यवहारको आलोचना गरेकी थिइन्। उनले किसानको संवेदनशीलतामाथि हाँस्नु दुःखद भएको टिप्पणी गरेकी थिइन्।
