महाकाली नदीमा पानीको बहाव एक लाख २४ हजार ४५४ क्युसेक नाघेपछि कञ्चनपुरको शारदा ब्यारेजमा चारपांग्रे सवारीसाधनको आवतजावतमा पूर्ण रोक लगाइएको छ। जिल्ला प्रहरी कार्यालय कञ्चनपुरका प्रहरी नायब उपरीक्षक टेकबहादुर रावतले नदीको जलस्तर सतर्कता तह पार गरेकाले यो निर्णय गरिएको बताए।
सुदूरपश्चिमका पहाडी जिल्लामा निरन्तर वर्षा भइरहेकाले महाकाली नदीको बहाव उल्लेख्य रूपमा बढेको छ। पहाडी क्षेत्रमा वर्षा जारी रहेकाले नदीको जलस्तर अझै बढ्नसक्ने सम्भावना छ।
स्थानीय प्रशासनले महाकाली नदी आसपासका तटीय क्षेत्रका बासिन्दालाई उच्च सतर्कता अपनाउन आग्रह गरेको छ। जल तथा मौसम विज्ञान विभागले सुदूरपश्चिम प्रदेशका अधिकांश स्थानमा केही दिन मध्यमदेखि भारी वर्षाको सम्भावना रहेको जनाएको छ। साना नदी, खोला तथा नालामा आकस्मिक बाढी आउन सक्ने भन्दै विभागले सतर्क रहन आग्रह गरेको छ।
