आर्थिक वर्ष २०८२/८३ मा मेची भन्सार कार्यालयले लक्ष्यको ९३.३० प्रतिशत राजस्व सङ्कलन गर्यो। यस अवधिमा रु १७ अर्ब ६७ करोड ७२ लाख ११ हजार राजस्व सङ्कलन भएको छ।
कार्यालयले रु १८ अर्ब ८८ करोड ७७ लाख ४८ हजार ३०० राजस्व सङ्कलनको लक्ष्य राखेको थियो। अघिल्लो आर्थिक वर्षको तुलनामा यस वर्ष राजस्व सङ्कलनमा करिब रु एक अर्ब ७४ करोड ६० लाखले वृद्धि भएको छ।
आर्थिक वर्ष २०८१/८२ मा कार्यालयले रु १७ अर्ब ३४ करोड ४६ लाख २५ हजार राजस्व लक्ष्य पाएको थियो। सो वर्ष रु १५ अर्ब ९३ करोड ११ लाख ६६ हजार सङ्कलन गरी लक्ष्यको ९१.८६ प्रतिशत हासिल गरेको थियो।
आर्थिक वर्ष २०८०/८१ मा रु १८ अर्ब २५ करोड ७८ लाख ६८ हजारको लक्ष्यमा रु १४ अर्ब २३ करोड ५२ लाख ६० हजार सङ्कलन भएको थियो। त्यस वर्ष लक्ष्य प्राप्ति दर ७८.४० प्रतिशत थियो।
आर्थिक वर्ष २०७९/८० मा रु २० अर्ब २४ करोड १८ लाख ३८ हजारको लक्ष्यमा रु १४ अर्ब चार करोड ५९ लाख २० हजार सङ्कलन भएको थियो। त्यसबेला लक्ष्य प्राप्ति दर ७०.२१ प्रतिशत रहेको थियो।
विसं २०१३ मा स्थापित मेची भन्सार कार्यालय नेपालका प्रमुख रणनीतिक भन्सार कार्यालयमध्ये एक हो। कार्यालय मातहत छ वटा छोटी भन्सार कार्यालय रहेकामा हाल गौरीगञ्ज छोटी भन्सार कार्यालय मात्र सञ्चालनमा रहेको सूचना अधिकारी माङ्कल राईले जानकारी दिए।
मेची भन्सारबाट भारत, चीन, बङ्गलादेश र भुटानलगायत मुलुकमा निकासी पैठारी हुने गरेको छ।
