काठमाडौँ उपत्यकामा मेलम्ची खानेपानी आयोजनाको पानीको प्रभावकारी वितरण सुनिश्चित गर्न सुन्दरीजल क्षेत्रमा हालसम्मकै सबैभन्दा ठूलो, १८०० मिलिमिटर व्यासको पाइप बिछ्याउने कार्य सुरु गरिएको छ। आयोजना कार्यान्वयन निर्देशनालय (पीआईडी) ले यो पूर्वाधार निर्माण अगाडि बढाएको हो।
निर्देशनालयका अनुसार भक्तपुर, कीर्तिपुर, मध्यपुरथिमि, कपन, जोरपाटी र पेप्सीकोला क्षेत्रमा खानेपानी वितरण सञ्जाल विस्तारका लागि निर्माण प्रक्रिया अघि बढाइएको छ। यसका लागि बोलपत्र आह्वान भइसकेको र चाँडै अन्य प्रक्रिया सुरु हुने निर्देशनालय प्रमुख एवं इन्जिनियर रामकुमार श्रेष्ठले जानकारी दिए।
मेलम्चीको पानीलाई उपत्यकाका विभिन्न क्षेत्रमा सहज रूपमा पुर्याउनका लागि निर्देशनालयले दिन र रात दुवै सिफ्टमा काम गरिरहेको छ। विभिन्न स्थानमा ‘रिजर्भ’ ट्याङ्की निर्माण, पाइपलाइन विस्तार र अन्य पूर्वाधार निर्माणका कामहरू तीव्र गतिमा भइरहेका छन्।
पाइप परीक्षण सम्पन्न भएपछि सम्पूर्ण प्रणाली काठमाडौँ उपत्यका खानेपानी लिमिटेड (केयुकेएल) लाई हस्तान्तरण गरिनेछ। प्रणाली हस्तान्तरणपश्चात् काठमाडौँवासीका घरघरमा नियमित रूपमा मेलम्चीको पानी वितरण गरिने प्रमुख एवं इन्जिनियर श्रेष्ठले बताए।
