मुग्लिन-नारायणगढ सडकखण्डको सिमलताल नजिकै पहिरो खस्दा सडक पूर्ण रूपमा अवरुद्ध भएको छ। बुधबार बिहान करिब ७ बजे पहिरो खसेपछि दुवैतर्फको यातायात ठप्प भएको हो।
सडक डिभिजन कार्यालय भरतपुरका अनुसार पहिरो पन्साएर यातायात सञ्चालनमा ल्याउनका लागि आवश्यक उपकरण र प्राविधिक टोली परिचालन गरिएको छ। अहिले मेसिनहरूको सहायताले लेदोसहितको पहिरो हटाउने काम भइरहेको छ।
सडक डिभिजनले एक घण्टाभित्र सडक सञ्चालनमा ल्याउने गरी काम तीव्र गतिमा भइरहेको जनाएको छ। यस अवधिमा अत्यावश्यकबाहेक यात्रा नगर्न र सम्बन्धित निकायको पछिल्लो सूचना हेरेर मात्रै यात्रा गर्न यात्रुहरूलाई आग्रह गरिएको छ। मनसुनी वर्षाका कारण पहिरोको जोखिम कायम रहेकाले चालकहरूलाई विशेष सतर्कता अपनाउन पनि सडक डिभिजनले अनुरोध गरेको छ।
