नेपाल–चीन उत्तरी कोरला नाकाबाट अवैध मालवस्तु ओसारपसारको आशंकामा मुस्ताङ प्रहरीले आठ मालवाहक कन्टेनर नियन्त्रणमा लिएको छ। प्रहरीले सदरमुकाम जोमसोमसहित जोमसोम–कोरला सडकको विभिन्न स्थानबाट कन्टेनरहरू नियन्त्रणमा लिएको हो।
जिल्ला प्रहरी कार्यालय मुस्ताङका सूचना अधिकारी प्रहरी निरीक्षक सन्तोष बस्यालका अनुसार, कन्टेनरहरू भन्सार यार्डमा जाँच नगरी सिधैँ सिल लगाएर ल्याइएको पाइएको छ। मनसुनका कारण रातिको समयमा सवारीसाधन चलाउन निषेध गरिएको अवस्थामा नियम विपरीत लुकाइछिपाइ चलाउँदै गरेको पाइएपछि कारबाही गरिएको हो।
नियन्त्रणमा लिइएका कन्टेनरहरू अवैध मालवस्तु हुनसक्ने बलियो आशंकामा प्रहरीले १० जनाको सुरक्षा टोली राजस्व अनुसन्धान विभाग, हरिहर भवन ललितपुरमा पठाएको छ।
गत वर्ष भदौ ३१ गते पूर्ण रूपमा सञ्चालनमा आएको कोरला नाकाबाट यसअघि पनि पटकपटक अवैध सामान बरामद भइसकेको छ। गत पुस ९ गते २ करोड २४ लाख मूल्य बराबरको अवैध विद्युतीय चुरोट भेप र जेठ २ गते २० हजार थान विद्युतीय चुरोट भेप बरामद गरिएको थियो। यसले सीमा नाकामा राजस्व छली गर्ने गिरोह सक्रिय रहेको देखाउँछ।
