नारायणगढ–मुग्लिन सडकखण्डको नाम्सी नयाँ पुल नजिक पहिरो र ढुंगा खस्दा यातायात पूर्ण रूपमा ठप्प भएको छ। लगातारको वर्षाले सडकमा लेदोसमेत बगेको छ।
जिल्ला ट्राफिक प्रहरी कार्यालयका प्रमुख प्रहरी निरीक्षक अनिल थापाका अनुसार पहिरो पन्छाउने काम सुरु गरिएको छ। थप ढुंगा नझरेमा केही समयभित्र सडक सञ्चालनमा आउन सक्ने अनुमान छ। सडक डिभिजन कार्यालय भरतपुरका अनुसार तुइन खोला पुल र नाम्सी खोलाको नयाँ पुल नजिकै ढुंगा खसेको छ।
सडक डिभिजन कार्यालयले सडक खुलाउन उपकरण र जनशक्ति परिचालन गरेको छ। हाल पानी परिरहेको र पहिरोको जोखिम कायमै रहेकाले सडकको अद्यावधिक अवस्था बुझेर मात्र यात्रा गर्न चालक तथा यात्रुलाई अनुरोध गरिएको छ।
