राष्ट्रिय अनुसन्धान विभागका प्रमुख अनुसन्धान अधिकृत ठाकुरप्रसाद केसीविरुद्ध नक्कली शैक्षिक प्रमाणपत्र पेस गरेको आरोपमा अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको छ। केसीले भारतको उत्तर प्रदेशस्थित बोर्ड अफ हाई स्कुल एन्ड इन्टरमीडिएट एजुकेसनबाट जारी भएको भनिएको हाईस्कुल परीक्षाको झुट्टा प्रमाणपत्र पेस गरी सरकारी सेवा प्रवेश गरेको अख्तियारको दाबी छ।
केसीले उक्त नक्कली प्रमाणपत्रकै आधारमा २०६६ सालमा वरिष्ठ अनुसन्धान सहायक, २०७३ सालमा अनुसन्धान अधिकृत र २०८१ सालमा प्रमुख अनुसन्धान अधिकृत पदमा बढुवा पाएको अभियोग छ। अख्तियारले नक्कली प्रमाणपत्र प्रयोग गरी सरकारी सेवामा प्रवेश गरेको र त्यसैका आधारमा लाभ तथा सुविधा प्राप्त गरेको भन्दै भ्रष्टाचार निवारण ऐनअनुसार कारबाही र सजाय माग गरेको छ।
प्रमुख अनुसन्धान अधिकृतजस्तो जिम्मेवार पदमा रहेका केसीविरुद्ध मुद्दा दायर भएपछि उनको नियुक्ति र पदोन्नति प्रक्रियामाथि समेत प्रश्न उठेको छ।
