देशका पाँच प्रमुख राजमार्ग बाढी र पहिरोले पूर्ण रूपमा अवरुद्ध भएका छन्। मंगलबार बिहानको विवरण अनुसार पहिरो र बाढीले सडक बगाउँदा यातायात ठप्प भएको हो।
इलाममा मेची राजमार्ग, सिन्धुली र काभ्रेमा बीपी राजमार्ग, सिन्धुपाल्चोकमा अरनिको राजमार्ग, बागलुङमा कालीगण्डकी करिडोर र दार्चुलामा महाकाली राजमार्ग अवरुद्ध छन्। यी राजमार्गहरू दैनिक हजारौं यात्रु र मालवाहक सवारीसाधनका लागि महत्वपूर्ण मार्ग हुन्।
वर्षा जारी रहेकाले पहिरो र बाढीको जोखिम कायमै छ। प्रहरीले सर्वसाधारण यात्रुहरूलाई यात्रा सुरु गर्नुअघि सडकको पछिल्लो अवस्थाबारे जानकारी लिएर मात्रै यात्रा गर्न आग्रह गरेको छ। सडक खुलाउने प्रयास भइरहेको छ।
