सुदूरपश्चिम र लुम्बिनी प्रदेशका केही स्थानमा तापक्रम ४० डिग्री सेल्सियसभन्दा बढी पुग्ने अनुमान छ। गण्डकी र कोशी प्रदेशका केही स्थानमा भारी वर्षाको सम्भावना छ। मौसम पूर्वानुमान महाशाखाले सतर्कता अपनाउन आग्रह गरेको छ।
हाल देशमा पश्चिमी तथा स्थानीय वायुको प्रभाव छ। पूर्वी भूभाग नजिक न्यूनचापीय क्षेत्रको असर छ। यसले गण्डकी प्रदेशका थोरै स्थानमा मेघगर्जनसहित वर्षा गराइरहेको छ।
आज दिउँसो कोशी, बागमती, गण्डकीका हिमाली-पहाडी भेगका केही स्थानमा वर्षाको सम्भावना छ। मधेशलगायत कोशी, बागमती, गण्डकीका तराई भेगमा पनि मध्यम वर्षा हुनेछ। लुम्बिनी र कर्णालीका हिमाली-पहाडी भेगका एक-दुई स्थानमा वर्षा र हिमपातको सम्भावना छ। गण्डकी प्रदेशको पहाडी भूभागको एक-दुई स्थानमा भारी वर्षाको सम्भावना छ।
सुदूरपश्चिम र लुम्बिनीका पहाडी भेगमा तातो दिनको अनुभव हुनेछ। तराईका भूभागमा तातो लहर चल्नेछ। राति कोशी र मधेशका केही स्थानमा वर्षा हुनेछ। बागमती, गण्डकीका हिमाली-पहाडी भेग र कर्णालीका हिमाली भेगका थोरै स्थानमा वर्षा र हिमपातको सम्भावना छ। कोशी प्रदेशको पहाडी र तराई भेगका एक-दुई स्थानमा भारी वर्षाको सम्भावना छ।
विभागले आगामी तीन दिन लुम्बिनी र सुदूरपश्चिममा तापक्रम ३८ डिग्री सेल्सियसभन्दा बढी रहने जनाएको छ। थोरै स्थानमा ४० डिग्री सेल्सियस नाघ्ने अनुमान छ। यसबाट बच्न तयारी र सतर्कता अपनाउन अनुरोध गरिएको छ।
मौसमविद् सञ्जिव अधिकारीका अनुसार सुदूरपश्चिम र लुम्बिनीका तराई भेगमा मध्यम तातो लहर चल्नेछ। पहाडी भेगमा तातो दिनको सम्भावना छ। यी प्रदेशका केही स्थानमा यसअघि नै तापक्रम ४० डिग्री सेल्सियसभन्दा बढी मापन गरिएको छ।
सतर्कता अपनाउनुपर्ने जिल्ला कञ्चनपुर, कैलाली, डोटी, बर्दिया, बाँके र दाङ हुन्। अध्यावधिक गर्नुपर्ने जिल्ला बैतडी, डडेलधुरा, अछाम, सुर्खेत, सल्यान, रोल्पा, प्युठान, पाल्पा, अर्घाखाँची, रुपन्देही र कपिलवस्तु हुन्।
तातो हावा र लहरले थकाई, कमजोरी, तिर्खा, टाउको दुखाइ, खुट्टा बाउँडिने, चक्कर आउने, बेहोस हुने, मांसपेशी दुख्ने र बान्ता हुनेजस्ता समस्या निम्त्याउन सक्छ। घरभित्रै बस्ने, बाहिर ननिस्कने, सुती कपडा लगाउने, टाउको छोप्ने र प्रशस्त झोल पदार्थ पिउन सल्लाह दिइएको छ। स्वास्थ्य समस्या देखिए स्वास्थ्यकर्मीको सल्लाह लिन अनुरोध गरिएको छ।
