जोगबनी नाकामा नेपाल र भारतका सीमा सुरक्षा अधिकारीबीच सीमापार अपराध नियन्त्रण र सुरक्षा व्यवस्था सुदृढ पार्ने उद्देश्यले समन्वय बैठक बसेको छ। सशस्त्र प्रहरी बल (एपीएफ) र भारतको सशस्त्र सीमा बल (एसएसबी) का अधिकारीहरू सीमा नियन्त्रण चौकी (बीसीपी) मा भेला भएका हुन्।
५६औं वाहिनी सशस्त्र सीमा बल बथनाहाको कार्यक्षेत्रअन्तर्गत एफ समवाय जोगबनीको बीसीपी गेटमा बसेको बैठकको अध्यक्षता ५६औं वाहिनीका द्वितीय कमान अधिकारी नितिन कुमार गुप्ताले गरेका थिए।
नेपाली पक्षको नेतृत्व सशस्त्र प्रहरी बल मोरङका प्रमुख एसपी गेहेन्द्र कुमार भण्डारीले गरेका थिए। टोलीमा डीएसपी सूर्यप्रकाश शर्मा, निरीक्षक गणेश मल र धीरज मल सहभागी थिए। भारतीय पक्षबाट गुप्तासहित द्वितीय कमान अधिकारी प्रवीण कुमार र निरीक्षक हरेन्द्र सिंह उपस्थित थिए।
बैठकमा सीमावर्ती क्षेत्रमा शान्ति, सुरक्षा र कानुन व्यवस्था कायम राख्न दुवै देशका सुरक्षाकर्मीहरूबीच संयुक्त गस्तीलाई प्रभावकारी बनाउने सहमति भएको छ।
सीमा सुरक्षा मजबुत पार्न सीमापार अपराध नियन्त्रण, आपराधिक तत्वहरूको गतिविधिमा रोक र तस्करी नियन्त्रणका लागि तत्काल गुप्तचर सूचना आदानप्रदान गर्ने निर्णय गरिएको छ।
सीमा क्षेत्रबाट हुने मानव बेचबिखन तथा ओसारपसार रोकथाममा कडा सतर्कता अपनाउने र दशगजा क्षेत्रको अतिक्रमण रोक्ने विषयमा पनि छलफल भएको थियो।
भारतीय र नेपाली मुद्राको अवैध ओसारपसार नियन्त्रण गर्न दुवै पक्षले कडा निगरानी राख्ने सहमति जनाएका छन्। सीमा क्षेत्रमा शान्ति, सुरक्षा र कानुनको पालना सुनिश्चित गर्न आपसी समन्वय र सहकार्यलाई निरन्तरता दिने प्रतिबद्धता व्यक्त गरिएको छ।
